27. september 2018

Fimm félög fengu styrk til að fjölga börnum erlendra foreldra í íþróttum

„Það er lofsvert að vekja athygli á börnum með annað móðurmál en íslensku. Ég er virkilega ánægð með þetta framtak,“ segir Lilja Alfreðsdóttir, mennta- og menningarmálaráðherra, um verkefnið Aukin þátttaka barna og ungmenna af erlendum uppruna í skipulögðu íþrótta- og æskulýðsstarfi. Þetta er samstarfsverkefni UMFÍ og ÍSÍ og var Lilja viðstödd þegar verkefnið var kynnt og tilkynnt hvaða fimm íþróttafélög og íþróttahéruð hlutu styrki til að auka hlut barna af erlendum uppruna í íþróttum.

 

Bæklingur um íþróttir

Í tengslum við verkefnið hafa verið gefnið út bæklingar á fimm tungumálum, auk íslensku, þar sem finna má hagnýtar upplýsingar um starfsemi íþrótta- og ungmennafélaga landsins, upplýsingar um æfingagjöld íþróttafélaga, frístundastyrki, mikilvægi þátttöku foreldra í íþróttum barna og kosti þess að hreyfa sig í skipulögðu starfi. Markhópurinn eru foreldrar barna og ungmenna af erlendum uppruna. Bæklingurinn er gefinn út á sex tungumálum, þ.e. á íslensku, ensku, pólsku, tælensku, litháísku og filippseysku.

 

Íþróttir eru fullkomin forvörn

Menntamálaráðherra sagði frábært að gera íþróttir aðgengilegar öllum enda sé það vettvangur fyrir alla til að njóta sín. Málið sé brýnt. „Mér finnst mikilvægt í stefnumótun okkar að við erum með staðreyndirnar á hreinu til að halda áfram. Það má finna áherslu málsins hjá okkur í nýjum fjárlögum og íþróttasjóði til að auka þátttöku erlendra barna í íþróttum,“ sagði hún.

Vísaði ráðherra þar til erindis sem Margrét Lilja Guðmundsdóttir, sérfræðingur hjá Rannsóknum og greiningu, flutti um hlutfall barna af erlendu bergi brotnu í íþróttum. Margrét sagði forvarnargildi íþrótta óumdeilanlegt og sé það til fyrirmyndar í öðrum löndum. Hingað komi fjöldi fólks, bæði frá erlendum stjórnvöldum og blaðamenn, til að fræðast um árangur Íslendinga í forvarnarmálum.

„Við vitum að skipulagt íþrótta- og tómstundastarf er eitt af lykilatriðunum,“ sagði Margrét Lilja. Talið er að um 10% íbúa á Íslandi séu innflytjendur en samanlagt er fyrsta og önnur kynslóð innflytjenda 12% allra þeirra sem búa á Íslandi. Samkvæmt niðurstöðum rannsóknar sem Rannsókn og greining lagði fyrir alla nemendur í 8. – 10. bekk á Íslandi 2016 stunda 56% barna og ungmenna nær aldrei íþróttir þar sem engin íslenska er töluð á heimilinu og 46% barna og ungmenna stunda nær aldrei íþróttir þar sem íslenska er töluð ásamt öðru tungumáli.

Margrét sagði sláandi hversu stórt hlutfall ungmenna af erlendum uppruna virðist ekki stunda íþróttir. Í næstu könnun verði spurt um fæðingarland viðkomandi.

 

Vilja sjá fleiri börn erlendra foreldra stunda íþróttir

Á fundi UMFÍ og ÍSÍ í dag var tilkynnt hvaða fimm íþróttafélög og íþróttahéruð hljóti styrk til að standa fyrir verkefnum sem hvetja börn af erlendum uppruna til þátttöku í íþróttastarfi. Félögin sem hljóta styrki eru ÍBV, Héraðssamband Snæfells- og Hnappadalssýslu, Íþróttabandalag Akraness, Valur og Taekwondodeild Keflavíkur. Auk þessa héldu erindi þau Maciej Baginski, körfuboltamaður frá Njarðvík, og Samar E. Zahilda, taekwondokona úr Ármanni. Maciej er frá Póllandi en foreldrar Samar frá Pakistan. Í erindum sínum lýstu þau bæði því hvað íþróttaþátttaka hefur gert fyrir þau.

 

Myndatexti:

Á myndinni hér að ofan má sjá fulltrú íþróttafélaganna og héraðanna taka við styrk vegna verkefnis sem ætlað er að fjölga börnum af erlendum uppruna í íþróttum ásamt fleirum. Frá vinstri: Líney Rut Halldórsdóttir, framkvæmdastjóri ÍSÍ; Einar Haraldsson, formaður og framkvæmdastjóri Keflavík – íþrótta- og ungmennafélag; Herdís Hallsdóttir, íþróttafulltrúi Vals; Hildur Karen Aðalsteinsdóttir frá ÍA; Lilja Alfreðsdóttir, mennta- og menningarmálaráðherra; Garðar Svansson, fulltrúi HSH; Sigríður Inga Kristmannsdóttir, fulltrúi ÍBV, og Auður Inga Þorsteinsdóttir, framkvæmdastjóri UMFÍ.