28. júní 2021

Smári í Koppafeiti: Stefnum á hörkuæfingar fyrir Unglinglandsmótið

„Við erum mjög spenntir fyrir Unglingalandsmótinu á Selfossi. Þetta er ótrúlegt tækifæri sem við fáum að spila fyrir framan alla og hita upp fyrir stóru nöfnin sem koma fram. Við stefnum á hörkuæfingar fram að mótinu,“ segir Arilíus Smári Orrason, bassaleikari og einn söngvara í hljómsveitinni Koppafeiti.

Koppafeiti er ein þeirra hljómsveita sem munu koma fram á Unglingalandsmóti UMFÍ á Selfossi um verslunarmannahelgina og hita upp fyrir vinsælasta tónlistarfólk landsins sem þar kemur fram. Þar á meðal eru Bríet, Frikki Dór, Stuðlabandið, GDRN og margir fleiri.

 

16 ára slá í gegn

Hljómsveitin Koppafeiti samanstendur af þremur 16 ára tónelskandi Selfyssingum og var stofnað til að taka þátt í tónlistarkeppni félagsmiðstöðvarinnar Zelsíus á Selfossi sem haldin var sem undankeppni fyrir þátttöku á Samfés. Þeir eru allir nýútskrifaðir úr Sunnulækjarskóla á Selfossi. Þar voru þeir í nemendaráði og sömdu meðal annars árshátíðarlag skólans og er það komið með 1.200 spilanir á Spotify. Þeir ætla allir í haust að feta áfram menntaveginn í Fjölbrautarskóla Suðurlands (FSu) á Selfossi.

Hér er hægt að hlusta á Koppafeiti á Spotify

 

 

Þótt bandið hafi ekki komist á Samfés þá var Koppafeiti valin skemmtilegasta hljómsveitin. Hún hefur átt góðu gengi að fagna og er hægt að hlusta á tvö frumsamin lög hljómsveitarinnar á veitum eins og Spotify. Það eru lögin COVID í burtu, sem á einstaklega vel við núna, og lagið Sleikar og sleggjur.

Smári segir erfitt að skilgreina tónlistarstefnu Koppafeiti. „Við reynum að vera fjörugir og hafa gaman af þessu. En við erum líka eiginlega út um allt því eitt lagið er köntrí á meðan annað er diskó og pepplag.“ segir hann.

 

Kröftugur jarðvegur á Suðurlandi

Suðurlandið hefur í gegnum árin verið ansi kröftugur jarðvegur fyrir tónlistarfólk og margar hljómsveitir sprottið þar upp. Þekktastar þeirra eru vafalítið rokkbandið Mánar sem trylltu landsmenn fyrir nokkrum áratugum síðan, Skítamórall, sem enn er að senda frá sér stórsmelli, Land og synir, Á móti Sól og margt fleira. En síðan er auðvitað tónlistarmaðurinn Jónas Sig úr Þorlákshöfn og Magnús Þór Sigmundsson og fleira tónvisst og skapandi fólk búsett í Hveragerði.

 

 

Smári segir félagana í Koppafeiti hafa fengið mikið af tækifærum eftir hljómsveitarkeppnina sem þeir hafi nýtt. Unglingalandsmótið sé enn eitt tækifærið sem þeim bjóðist.

„Okkur hlakkar mikið til að koma fram á mótinu og hitta aðrar hljómsveitir. Við vitum að mikið af hæfileikaríku fólki er í hljómsveitum hér og þar en færri á okkar aldri. Við stefnum á að kynnast þeim og hita upp fyrir hitt tónlistarfólkið,“ segir hann að lokum.

Fjöldi tónlistarfólks kemur fram á Unglingalandsmóti UMFÍ á Selfossi um verslunarmannahelgina. Þar á meðal eru stærstu stjörnur dagsins, Bríet, GDRN, Frikki Dór og Stuðlabandið auk Sprite Zero Klan og Moskvits. Auk þess sjá plötusnúðar um að halda stuðinu uppi.

 

Sjáumst á Unglingalandsmóti UMFÍ á Selfossi um verslunarmannahelgina!

Fleiri myndir frá Unglingalandsmóti UMFÍ