03. september 2021

Sportabler tekur við sem starfsskýrslukerfi ÍSÍ og UMFÍ

„Við erum spennt fyrir samstarfinu sem við höfum trú á að færi íþróttahreyfingunni upplýsingar sem hægt verður að nýta til þess að efla starfið enn meira og aðstoða við áherslur og ákvarðanatöku. Tæknin og tækifærin sem fylgja henni eru samfélaginu til góða,“ segir Haukur Valtýsson, formaður UMFÍ. Hann skrifaði í dag ásamt þeim Markúsi Mána M. Maute, framkvæmdastjóra Abler, og Gunnari Bragasyni frá ÍSÍ undir samning við fyrirtækið Abler (sem sem rekur hugbúnaðinn Sportabler) um gerð á nýju rafrænu kerfi fyrir íþróttahreyfinguna. Rafræna kerfið er ætlað fyrir lögbundin skil á starfsskýrslum íþróttahreyfingarinnar.  

Undir samninginn skrifuðu jafnframt þær Líney Halldórsdóttir, framkvæmdastjóri ÍSÍ, og Auður Inga Þorsteinsdóttir, framkvæmdastjóri UMFÍ.

Kerfið sem Abler þróar mun leysa af hólmi starfsskýrsluskil í Felix, félagakerfi ÍSÍ og UMFÍ, sem hefur verið í notað til verkefnisins frá árinu 2004. Með tilkomu nýs kerfis munu skil hjá íþróttahreyfingunni fara fram í gegnum Sportabler, sama kerfi og meirihluti íþróttafélaga notar í sínu daglega starfi. Horft er til þess að með nýju kerfi verði skil félaganna skilvirkari og einfaldari en áður.

Afar mikilvægt er fyrir íþróttahreyfinguna að hafa nákvæma yfirsýn yfir umfang og gerð hreyfingarinnar til að geta meðal annars uppfyllt upplýsingaskyldu til stjórnvalda og sem grunnskilyrði til útreikninga meðal annars í tengslum við dreifingu fjármagns. ÍSÍ og UMFÍ vænta mikils af samstarfinu við Abler ehf. og telja undirritun samningsins mikilvægt skref í átt að hagkvæmari og skilvirkari skýrsluskilum í hreyfingunni. Stefnt er að því að íþróttahreyfingin geti skilað starfsskýrslum fyrir starfsárið 2021 í nýju kerfi strax á næsta ári.

Markús Máni segir í tilkynningu ánægjulegt að fá að taka þátt í þessu þýðingarmikla verkefni.

„Íþróttastarfið er gríðarlega mikilvægt fyrir samfélagið, og við trúum því að við stöndum frammi fyrir einstökum tækifærum með því að stuðla að skilvirkari ferlum, gagnadrifinni framþróun og samnýtingu á þeirri þekkingu sem til staðar er í hreyfingunni. Við þökkum fyrir það traust sem okkur er sýnt og gerir okkur frekari þátttakendur í starfi ÍSÍ og UMFÍ við að skapa umhverfi sem styður sem best við það verðmæta starf sem unnið er í hreyfingunni á hverjum degi,” segir hann.

Í tilkynningu er jafnframt haft eftir Lárusi Blöndal, forseta ÍSÍ, að mikils sé vænst af samstarfinu við Abler og nýju skilakerfi fyrir íþróttahreyfinguna.

„Upplýsingar úr starfsskýrslum eru gríðarlega dýrmætar og mikilvæg undirstaða fyrir allt okkar starf. Það er því stórt hagsmunamál að skil á starfsskýrslum gangi hratt og vel fyrir sig. Við treystum Abler til að skila okkur góðu og skilvirku kerfi sem bæta mun skil og einfalda árleg og lögbundin starfsskýrsluskil fyrir íþróttahreyfinguna,” segir hann.