Upplýsingar

Ungmennabúðir UMFÍ á Laugarvatni eru ætlaðar nemendum í 9. bekk grunnskóla. Nemendur hafa möguleika á að dvelja þar frá mánudegi til föstudags við leik og störf. Verð fyrir dvöl í búðunum er 29.000kr. starfsveturinn 2019-2020. Innifalið er m.a. dagskrá, gisting, matur, drykkjarflaska og bolur. Viðburðir eru í formi námskeiða. Markmiðið með dvölinni er að styrkja félagsfærni ungmenna, efla vitund þeirra fyrir umhverfi sínu og samfélagi ásamt mikilvægi þess að hafa heilbrigðan lífsstíl að leiðarljósi.  

Hér fyrir neðan er að finna hagnýtar upplýsingar.

 

 

Skólastjórnendur

Hagnýtar upplýsingar

Bókanir

Einungis skólastjórnendur grunnskólanna geta bókað dvöl í Ungmennabúðum UMFÍ. Ætlast er til að uppistaða fararstjórateymis séu kennarar nemendanna sem bókað er fyrir. Þegar sótt er um þarf að tilkynna hver verður aðalfararstjóri og ber ábyrgð á undirbúningi hóps og fararstjórateymis.

Aðalfararstjóri sér um samskipti við Ungmennabúðir við undirbúning og á meðan á dvöl stendur. Hann þarf alltaf að vera úr kennarateymi skólans og vera á Laugarvatni alla vikuna. Litið er svo á að þegar skólastjórnandi bókar dvöl sé hann að samþykkja reglur og fyrirkomulag sem eru í búðunum. 

 

Innifalið í verði er öll dagskrá, fæði, gisting, bolur og brúsi. Fararstjórar hópanna sjá um frívaktir og sinna þátttakendum í frítíma. Starfsfólk búðanna sjá um námskeið sem eru yfirleitt frá kl. 09:30 - 17:00 á daginn. 

Skólarnir þurfa sjálfir að sjá um akstur til og frá búðunum. Mæting er kl. 11 á mánudegi og brottför er kl. 11 á föstudegi.  
 


Vinsælar ungmennabúðir

Ungmennabúðir UMFÍ  njóta mikilla vinsælda hjá nemendum 9. bekkjar grunnskóla. Þeir geta komið og dvalið eina viku í senn yfir skólaárið, frá 1. september til loka maí.

Á síðasta skólaári dvöldu 1.900 börn í Ungmennabúðunum. Þau ungmenni sem dvelja að Laugarvatni eru í stífri dagskrá alla daga vikunnar í óformlegu námi sem leitt er af tómstundaleiðbeinendum. Nemendurnir stunda mikla útivist, fara í gönguferðir og eru í útileikjum, kynnast íslenskri þjóðtrú og prófa ýmislegt heilbrigt sem þau eiga annars ekki kost á.

Í Ungmennabúðum UMFÍ kynnast ungmenni styrkleikum sínum og veikleikum og læra að vinna með þá til að bæta félagsfærni sína.
 
Nánari upplýsingar veitir Anna Margrét Tómasdóttir, forstöðumaður Ungmennabúða UMFÍ, í síma 861-2660 / 434-1600. Netfang ungmennabudir@umfi.is

Ábyrgð skólans

Ábyrgð skólans/skólastjóra sem dvelur í Ungmennabúðunum hverju sinni

Ef tjón verður í búðunum sem nemendur valda viljandi eða óviljandi ber skólinn ábyrgð á því að það verði bætt. Forstöðumaður útbýr tjónaskýrslu sem báðir aðilar fá eintak af, síðan er skólanum sendur reikningur fyrir tjóninu.

Þegar nemanda er vísað heim, er það á ábyrgð viðkomandi grunnskóla að koma nemandanum heim. Það þarf að vera skýrt af hendi skólans fyrir brottför, hvernig staðið skuli að slíkum málum. Gott væri að hafa skriflega viðbragðsáætlun tilbúna.

Skriflegt samþykki foreldra / forráðamanna fyrir ferðinni þarf að liggja fyrir og foreldrum sé kunnugt um það hvernig skóli hyggst bregðast við ef senda þarf nemanda heim frá Laugarvatni.

Forráðamenn skulu búnir að greiða ferðina til skólans, lámark tveimur vikum fyrir komu. Skila þarf tímanlega inn upplýsingum til forstöðumanns um þann fjölda sem kemur.

Fararstjóri í ferðinni ætti að þekkja nemendurna sem hann fylgir.

Umsóknareyðublað 2019 - 2020

Vinsamlegast hafið beint samband við forstöðumann til þess að bóka dvöl. 

Anna Margrét Tómasdóttir er forstöðumaður.

Netfang ungmennabudir@umfi.is.

Sími 861 2660

Opnað verður fyrir bókanir 2020 - 2021 um áramótin. 

Fararstjórar

Hagnýtar upplýsingar

Til fararstjóra

Fararstjóri er sá sem ber ábyrgð á því að vera í samskiptum við búðirnar við undirbúning dvalar. Fararstjóri þarf að hafa samband við forstöðumann með lágmark þriggja vikna fyrirvara og staðfesta fjölda nemenda sem reiknað er með að komi. Í framhaldinu er herbergjaskipan send til viðkomandi.

Fararstjóri er í samskiptum við Ungmennabúðirnar á meðan undirbúningur stendur yfir og á meðan á dvöl stendur. Fararstjóri dvelur í búðunum allan tímann.

Aðalfararstjóri ber ábyrgð á því að undirbúa fararstjórateymið sem kemur í Ungmennabúðirnar. Hann ber ábyrgð á að fararstjórarteymið sé vel undirbúið og að allir séu búnir að lesa handbókina með allavega þriggja vikna fyrirvara vegna undirbúnings nemendahóps heima fyrir. Reynsla fararstjóra er sú að ekki þykir gott að skipta út fararstjórum í vikunni. Það er ekki gott fyrir þá fararstjóra sem eru alla vikuna að hafa aðra með sem koma og fara, það myndast aukið álag á þá sem eru allan tímann. Best er að allir fararstjórar séu allan tímann á Laugarvatni.   

Handbókin er ansi viðamikil og það skiptir því máli að lesa hana gaumgæfilega áður en komið er. Þar koma fram allar helstu upplýsingar um dvölina og ástæður fyrir ýmsum reglum og verkefnum. Einnig leynast þar svör við ýmsum spurningum sem geta brunnið á fararstjórum og reynt er að fyrirbyggja það sem auðveldlega getur farið úrskeiðis. Af fenginni reynslu eru allt of fáir sem kynna sér efni handbókar nægilega vel! 

Verð fyrir dvöl 2019 - 2020 er 29.000 kr.- ekki er veittur systkinaafsláttur nema ef um þríbura sé að ræða.

Mæting er kl. 11 á mánudegi, brottför kl. 11 á föstudegi.

 

Námsefni 

Hér fyrir neðan má finna námsefni sem kennarar/ fararstjórnar geta nýtt við kennslu áður en komið er á Laugarvatn ef þeir kjósa það. Það er reynsla okkar í búðunum að því betur sem nemendur eru búnir því betur njóta þeir dagskrárinnar á Laugarvatni. 

Bæklingur til nemenda og forráðamanna.

 

Handbók fararstjóra

Handbók fararstjóra er send í tölvupósti til viðkomandi fararstjóra hverju sinni. 

 

Ýmis gagnleg gögn

Útbúnaðarkennsla.

Útivist og útbúnaður.

Verklýsing og ábyrgð fararstjóra. 

 

Hvað segja fararstjórar

Matsblöð kennara, haust 2018.

Matsblöð kennara, haust 2017.

Matsblöð kennara, haust 2015.

 

Reynir Aron, nemendi Laugalækjaskóla dvaldi í Ungmennabúðunum í nóvember 2015. Hann útbjó myndband eftir dvölina birti á youtube. Sjón er sögu ríkari. Smelltu HÉR

Aðstaða og gátlisti

Aðstaða fararstjóra

Fararstjórahópurinn hefur fimm herbergi til umráða, eitt eins manna og fjögur tveggja manna herbergi. Fararstjórar þurfa að skipta á milli sín herbergjum og raða sér niður á þau á mánudegi. Fararstjórar gista á þessum herbergjum þegar þeir eru ekki á næturvakt og geta nýtt þau í frítíma sínum. 

Setustofa fyrir fararstjóra er á skrifstofugangi. Þar er kaffi, hraðsuðuketill og ýmislegt lestrarefni. Nemendum er óheimilt að vera í setustofunni. Fínt 4G net er á Laugarvatni.

 

Gátlisti fararstjóra

  • Sængurver, koddi, koddaver, lak, baðhandklæði og lítið handklæði. (Sængur eru á herbergjum).
  • Sundföt og íþróttaföt.
  • Útiföt og gönguskó.
  • Inniskó.
  • Minniskubb fyrir myndir og myndbönd að lágmarki 5GB

Fararstjórar þurfa að ganga frá herbergjum sínum fyrir kl. 9:30 brottfarardag vegna þrifa.

Á fundi með fararsjórum á mánudegi er farið yfir nemenda hópinn. Mikilvægt er að fararstjórar viti af ef nemendur eru með mataróþol, ofnæmi eða eru grænmetisætur. Athygli er vakin á því að ekki er boðið sérstaklega upp á vegan matseðil. 

Foreldrar

Hagnýtar upplýsingar

Til foreldra/forráðamanna

 

Mataróþol, matarofnæmi og grænmetisfæði

Í Ungmennabúðunum er grænmetisfæði fyrir þá sem eru grænmetisætur.  Þá eru helstu vörur fyrir þá sem hafa glutenóþol og mjólkuróþol. Einnig er t.d til sojamjólk, rismjólk og sojaostur fyrir þá sem þola ekki mjólkurvörur. Oft er einnig til laktósafrí mjólk. Athygli er vakin á því að ekki er boðið upp á sérstakan vegan matseðil.

Tekið er tillit til þeirra sem eru með eggjaofnæmi og fiskióþol svo dæmi séu tekin. Reynt er að hafa sambærilegan mat fyrir þá sem hafa einhverskonar óþol og er framreyddur fyrir aðra nemendu. 

Fararstjóri þarf að láta eldhúsið vita  með viku fyrirvara um þau börn sem hafa mataróþol/ofnæmi til að tryggja að örugglega séu til þær vörur sem við á.

Á fundi með kennurum á mánudegi er farið yfir um hverja ræðir svo enginn gleymist og því er mikilvægt að fararstjóri nemenda viti af ef nemendur eru með mataróþol, ofnæmi eða eru grænmetisætur. 

Þeir sem eru með flóknari vandamál gagnvart mat eru beðnir um að hafa samband við ungmennabudir@umfi.is með a.m.k. átta daga fyrirvara. Vörur eru pantaði í eldhúsið með viku fyrirfara, erfitt er að bregðast við sérþörfum eftir það. 

 

Dýraofnæmi / Hræðsla við dýr

Mikilvægt er að láta fararstjóra vita ef barn ykkar er með dýraofnæmi og senda viðeigandi lyf með. Starfsmenn búðanna eiga nokkur dýr, nokkrar kisur og Rúrik og Rómeó, íslenska fjárhunda, fæddir 4. maí 2018. Hundarnri fá stundum að fara með í gönguferðir og nemendur geta hitt á þá á svæðinu fyrir utan búðirnar.

Mikilvægt er að koma skilaboðum til okkar ef að barn ykkar er hrætt við hunda. Ykkur er óhætt að senda okkur línu á ungmennabudir@umfi.is ef þið teljið að gæta þurfi sérstaklega að hundunum umrædda viku. 

 

Lyfjamál

Nemendur mega ekki hafa nein lyf á eigin ábyrgð með sér á Laugarvatn. Foreldrar verða að afhenda kennara eða fararstjóra öll lyf og líka verkjalyf. Þetta er mikilvægt vegna öryggismála hjá nemendum. Það hafa því miður komið upp vandamál í Ungmennabúðunum þar sem að lyf koma við sögu. Bara óvarkár meðferð verkjalyfja getur haft slæmar afleiðingar. Þetta er mjög mikilvægt og snýst um ef aðrir komast í lyf barnsins þar sem að herbergin eru ekki læst.

Nemendur hafa leyfi til að hafa á sér/í tösku hjá sér, astmaúða. Ef að nemandi þarf að hafa meðferðis astmalyf þarf að upplýsa aðalfararstjóra hópsins og umsjónakennara um málið, sem kemur upplýsingum til starfsmanna á þar til gerðum fundi. Nemendur geta haft meðferðis krem ef þess þarf inn á herbergjum.

 

Brottvísun

Þátttakenda getur verið vísað heim frá Laugarvatni ef þörf krefur. Ýmsar ástæður geta verið fyrir því.

Undantekningarlaust er vísað heim ef þátttakandi kemur með og/eða notar eigið eða annarra: áfengi, tóbak, munntóbak eða vímuefni. Einnig ef þátttakandi verður uppvís af þjófnaði og ef um viljandi skemmdaverk er að ræða. Forráðamenn fá ekki endurgreitt ef þátttakanda er vísað heim. Sækja þarf þátttakanda samdægurs ef að um brottvísun er að ræða. 

 

Reglur

Lífið í Ungmennabúðunum snýst um samskipti og er æskilegt að nemendur geti kúplað sig frá daglegu lífi og notið samverunnar með hvoru öðru.

Þess vegna er ekki leyfilegt að vera með t.d. síma, tölvur og tæki sem geta sýnt myndbandsefni. Mikilvægt er að foreldrar fari vel yfir þessi mál með börnum sínum  og sjái til þess að börnin fari ekki með raftæki á Laugarvatn sem eru ekki leyfileg. Hér er hægt að sjá reglur um raftæki í búðunum. 

 

Samskipti við barnir á meðan dvöl stendur yfir

Foreldrar geta skipulagt símatíma í samráði við fararstjóra hópsins, ef þeir telja þörf á.

Starfsfólk Ungmennabúðanna mælir ekki með að foreldrar séu að hafa samskipti við barn sitt á meðan dvölinni stendur nema nauðsynlegt sé. Engar fréttir eru góðar fréttir.

Símatímar fara fram eftir klukkan 17, þó ekki milli kl. 18-18:30. Ekki er æskilegt að foreldrar hringi fyrir klukkan 17:00 vegna anna á staðnum.

 

Réttur útbúnaður

Gott er að undirbúa barnið vel og tryggja góðan útbúnað, á þessari síðu eru ýmsar upplýsingar um útbúnað. Nemendur ganga um holt og hæðir þar sem ýmiss jarðvegur mætir þeim og verða skórnir þeirra að þola það.

 

Mikilvægt að merkja allan útbúnað vel

Það gleymist alltaf eitthvað í Ungmennabúðunum. Staðreyndin er sú að margir eiga dýran fatnað og dót.

Nemendurnir þekkja oft ekki sitt eigið dót. Til að einfalda það að koma eigum til eiganda er mikilvægt að föt og annað dót sé merkt. Sem dæmi þá samnýtum við íþróttahús og sundlaug með heimamönnum og menntaskólanum á Laugarvatni, þar ganga t.d 160 nemendur sem eiga sambærilegt dót/föt og barnið ykkar.

Ef ykkur er annt um að geta endurheimt eitthvað sem barnið ykkar gleymdi á staðnum, þá verðið þið að merkja það með nafni og símanúmer.

Haft verður sambandi við þá sem eru með merktar flíkur sem verða eftir. 

 

Annað

Ekki er veittur systkinaafsláttur af dvalargjaldi nema um þríbura sé að ræða.   

Bæklingur til nemenda og forráðamanna.

Útivist og útbúnaður.

Útbúnaðarkennsla fyrir nemendur.

Umsagnir

Takk kærlega fyrir okkur:) krakkarnir voru himinlifandi. 

Þetta var stórkostlegt tækifæri að vera með krökkunum í tæpa fimm sólahringa, í gegnum súrt og sætt, frá uppvakningu til svefnstunda.  

Á svona löngum tíma koma persónurnar fram í hverri manneskju, þeirra hegðun, virðing, hópefli, viðmót, hjálpsemi, dugnaður við sínar skyldur, þátttaka í leikjum og þrautum og ekki síst framkoma þeirra og virðing fyrir hvort öðru og okkur fullorðna fólkinu.

Þessi skemmtilega reynsla og allar þessar góðu minningar sem börnin öðluðust munu vera eitthvað fyrir þau til að búa að síðar.  Hópurinn var samheldinn og kemur nú til baka enn sterkari. Ég er svo þakklát fyrir að hafa átt þennan tíma með krökkunum og ykkur :)

Takk fyrir okkur!

Foreldrar 9. bekkjar Háteigsskóla, árgangur 2001.

Matseðill

Dæmigerður matseðill

 

Mánudagur

Kl. 12:30               Pasta, ostasósa og brauð  

Kl. 15:55               Ávaxtahressing

Kl. 18:00               Kjötbollur og meðlæti

Kl. 21:30               Kvöldhressing 

 

Þriðjudagur:

Kl. 8:15-9             Morgunverðarhlaðborð 

Kl. 11:25               Hressing 

Kl. 12:30               Skyr og brauð 

Kl. 15:20               Hressing

Kl. 18:00               Fiskur og meðlæti

Kl. 21:30               Kvöldhressing 

Miðvikudagur:

Kl. 8:15-9             Morgunverðarhlaðborð 

Kl. 10:50               Hressing 

Kl  12:30               Pastasalat og brauð

Kl. 15:20               Hressing 

Kl. 18:00               Lasagne og meðlæti 

Kl. 21:30               Kvöldhressing

Fimmtudagur:

Kl. 8:15-9             Morgunverðarhlaðborð

Kl. 13:00               Grjónagrautur, lifrapylsa og brauð 

Kl. 15:00               Hressing      

Kl. 18:00               Pizza og franskar

Kl. 23:00               Kvöldhressing

 
Föstudagur:

Kl. 8:20-9             Morgunverðahlaðborð


Brottför kl. 11:00


 
Athugið að um dæmigerðan matseðil er að ræða. Það eru alltaf ávextir í hressingu og grænmeti með kvöldmat.  Almenn ánægja er hjá þátttakendum Ungmennabúðanna með matinn hverju sinni. Matseðilinn er miðaður við það sem langflestir unglingar borða. Nægur matur er fyrir alla. Ætlast er til að þátttakendur beri sjálfir ábyrgð á að borða nægju sína hverju sinni því ekki er hægt að fara á öðrum tímum og fá að borða. Ekki er leyfilegt að hafa með sér nesti og nammi, vinsamlegast virðið það.

Nemendur

Hagnýtar upplýsingar

Ráð frá nemendum til nemenda

  • Taka með blað og penna.
  • Taka með fleiri föt fyrir útivistina/hlýrri föt. Klætt okkur betur eftir veðri. Vera með innanundirföt.
  • Fara vel yfir listann.
  • Vera með betri buxur.
  • Vera með inniskó og fleiri sokka.
  • Vera með heyrnatól með eða eyrnatappa til að útiloka hávaða.
  • Sleppa því að tuða í kennurunum um að fá að hafa símana, það var gott að vera án þeirra, annars hefðum við ekki kynnst eins vel.
  • Vera með ljós með sér.
  • Vera jákvæðari áður en við komum.
  • Hefði verið gott ef meiri áhersla hefði verið lögð á að við ættum að mæta með úr eða klukku.

 

Ævintýraleg dvöl

Ungmennabúðirnar eru staður þar sem samvera, samvinna, jákvæðni, virk þátttaka og gleði eru mikilvæg atriði.

Við vinnum saman að því að gera skemmtilega upplifun að góðum minningum.

Góður undirbúningur fyrir dvölina er því grundvallaratriði svo að þið mætið tilbúin til að takast á við lífið í búðunum sem er langt frá því sem þið þekkið heima fyrir.  

 

Það sem þátttakendum finnst um að vera í Ungmennabúðunum

  • Það á að koma hingað til þess að fara úr þægindahringnum og kynnast öðru fólki.
  • Útaf þetta er snilld.
  • Því þetta er frábær upplifun, án síma, maður kúplar sig úr venjulegu stundatöflunni.
  •  Það er geðveikt gaman.
  • Kynnast fleira fólki, þetta er ógeðslega gaman.
  • Til að æfa sig í mannlegum samskiptum, fólk þarf líka að losna frá netinu í smá tíma.
  • Sem skemmtilegar unglingabúðir.
    Því það hafa allir gott af að fara frá raftækjum.
  •  Til að kynnast hvor öðru betur.
  • Félagsvænn staður.
  • Því það er ótrúlega gaman og þú kynnist fullt af fólki.
  • Læra að vinna saman og kynnast nýju fólki.
  • Því að það er gaman, kynnist nýju fólki, starfsfólkið er skemmtilegt og alltaf góður matur og stemming milli liða.
  •  Fræðandi, skemmtilegt, góð leið til að kynnast nýju fólki.
  •  Frábær skemmtun.
Útbúnaðarlisti

Hafið í huga að koma með föt sem mega verða skítug og mega jafnvel skemmast. Engin ástæða til að vera með tískusýningu á Laugarvatni. Geymið sparifötin heima. Í Ungmennabúðunum verður maður skítugur og tekur þátt í allskonar verkefnum þar sem þörf er á að nemendur séu ekki að spá í hvort fötin geti skemmst.

 

Til að hafa á herbergi:

  • Sængurföt og kodda. Sængur eru á herbergjum.
  • Mikilvægt að hafa með lak á 90 cm rúm.
  • Smelltu hér til þess að sjá mynd af herbergi. 
  • Armbandsúr eða klukku til að hafa á herbergi
  • Blöð/stílabók og skriffæri (tússar eru bannaðir)
  • Eyrnatappa fyrir þá sem eru viðkvæmir fyrir hávaða.
  • Lítið handklæði og margnota plastglas við vaskinn.
  • Poka undir skítug föt og plastpoka undir skítuga og blauta skó. Það er EKKI hægt að fá poka á Laugum.
  • Góðar hugmyndir til að skreyta herbergið fyrir herbergjakeppnina.

 

Persónulegir munir:

  • Náttföt og inniskó
  • Föt til skiptanna- nóg af sokkum.
  • Snyrtidót:
  • Sjampó, sápa, og aðrar nauðsynlegar snyrtivörur
  • Varasalvi og rakakrem
  • Plástur og hælsærisplástur- nauðsynlegt!
  • Stelpur: dömubindi til öryggis.
  • Tannbursti, tannkrem.
  • Til að nota við dagskrá:
  • Sundföt og amk 2 stk handklæði sem eru þunn og fljót að þorna.
  • Íþróttaföt og innanhúsíþróttaskór (þó ekki með botni sem strika).

 

Fyrir útivistina:

  • Lítinn göngubakpoka eða bakpoka.
  • Regnföt og útivistarföt - mjög mikilvægt.
  • Ullarnærföt eða sambærileg síð nærföt. Mikilvægt yfir kaldasta tímann. ca, okt-apr.
  • Göngubroddar eða gormar eru góðir að hafa með yfir köldustu mánuðina og þegar frost er mikið.
  • Stígvél eða vatnsheldaskó eða gönguskó (við förum í gönguferðir á blautum jarðvegi). Það er óþarfi að mæta í fínu nýju skólaskónum sínum á Laugar. Þeir verða skítugir ef farið er í þeim út. Við nýtum náttúruna mikið til útiveru. Athugið að ekki er gott að ganga langar leiðir í stígvélum. Í janúar og febrúar getur verið snjór á svæðinu og eru því gúmmístígvél ekki hentug.
  • Athugið að þeir sem eru gjarnir að fá hælsæri eða eru ekki með nógu góða skó, hafið þá með hælsærisplástur. Varast skal að taka nýja skó. Það er mjög algengt að nemendur fá hælsæri á Laugum, vegna þess að þau eru ekki vel skóuð og ekki vön að ganga lengri leiðir.
  • Hlý útiföt (húfu, vettlinga, trefil, ullarsokka, úlpu og hlífðarbuxur, við erum mikið úti hvernig sem viðrar)
  • Göngusokka/ háa sokka svo það fari ekki snjór í skóna.
  • Ábending: mikilvægt er að vera búin að klippa táneglur áður en komið er á Laugar.

 

Laugarvatn:

Við erum staðsett alveg við Laugarvatn. Við vatnið eru heitir hverir sem þarf að varast en á sama skapi hita þeir vatnið upp.  Í september og október og jafnvel lengur ætlum við að reyna nota vatnið eins og hægt er. Botninn í vatninu er mjög óþægilegur og mælum við með að vera í skóm.

Dagskráliðurinn ÍSbjörninn fer fram í vatninu en er VAL. Það vilja auðvitað allir prófa Ísbjörninn og þá verður maður að vera með skó fasta á fæti. Tevur, Neoprene Skór, Sjósunds skór, sandala með bandi eða álíka skó ef til eru, eru góði til að fara í vatnið. Gamlir strigaskór duga líka ef þeir mega blotna. En þetta er valverkefni sem tekur stutta stund og því engin ástæða að kaupa skó í þetta verkefni.

 

Hvernig pökkum við:

Mælum með að nemendur komi með farangur í töskum en ekki í pokum. Gott er að miða við tösku sem kemst undir kojuna, sem eru 45cm frá gólfi.  Pokarnir eru óumhverfisvænir og duga bara aðra leiðina (ef pakkað er í ruslapoka, takið þá auka poka með til að pakka í heim- því pokarnir vilja týnast eða skemmast!).

Stillið þó farangri í hóf þetta eru ekki nema fimm dagar :-)

 

Annað:

  • Ferðataskan er fataskápurinn þinn á meðan dvöl stendur
  • Foreldrar verða að afhenda fararstjórum öll lyf og líka verkjalyf.
  • Merkið dótið ykkar vel. Merkið með nafni og símanúmeri og jafnvel skóla. Það gleymist ALLTAF eitthvað í búðunum. Það einfaldar leit ef dótið er merkt. Þið eruð að sjálfsögðu ábyrg fyrir eigin dóti. Best er að geyma verðmæti heima. Ef að dótið ykkar er merkt, verður haft samband og látið vita að það sé á Laugarvatni, annars endar það í kassa sem aldrei er vitjað um. Á hverju ári eru nokkrir kassar af dýrum útbúnaði barna sem engin þekkir. Foreldrar athugið: börnin þekkja ekki alltaf eigið dót!!

 

Annað sem ekki má hafa með:

  • Nesti (nammi, mat og drykki). Það er boðið upp á mat í Ungmennabúðunum. Þetta á einnig við hálsbrjóstsykur og tyggjó.
  • Þá má ekki hafa með eldfæri og vasahnífa/hnífa.
  • Spilin: Skellur fyrsta spilið, shit happens, Cards Against Humanity og spil sem eru bönnuð innan 18 ára. ​
  • Nemendur eiga EKKI að hafa lyf á herbergjum.
  • Allt það sem ekki má hafa með verður gert upptækt og litið er á það sem reglubrot...svo best er að skilja það bara eftir heima :-)

 

Ráð frá fyrri nemendum til ykkar:

  • Takið með ykkur blað og penna
  • Takið með fleiri föt fyrir útivistina/hlýrri föt. Klæða sig eftir veðri.
  • Vera með innanundirföt
  • Fara vel yfir listann
  • Vera með betri buxur
  • Vera með inniskó og fleiri sokka
  • Vera með heyrnatól með eða eyrnatappa til að útiloka hávaða
  • Sleppa því að tuða í kennurunum um að fá að hafa símana, það var gott að vera án þeirra, annars hefðum við ekki kynnst eins vel.
  • Vera með ljós með sér.
  • Vera jákvæðari áður en við komum.
  • Hefði verið gott ef meiri áhersla hefði verið lögð á að við ættum að mæta með úr eða klukku.