Funduðu saman í fyrsta sinn

Stjórnarfólk íþróttahéraða á Suðurlandi og framkvæmdastjóri Héraðssambandsins Skarphéðins (HSK) fundaði í fyrsta sinn öll saman á föstudag í síðustu viku. Markmiðið með fundinum var að byggja brú á milli sambandanna. Rakel Magnúsdóttir segir ferðina hafa heppnast frábærlega.

„Þetta var fyrsti samráðsfundur íþróttahéraða á okkar svæði og alveg frábærlega vel heppnuð Eyjaferð. Tilgangurinn var að byggja brýr á milli hèraða og fèlaga og mynda dýrmæt tengsl. Það tókst,“ segir Rakel Magnúsdóttir, annar tveggja svæðisfulltrúa íþróttahreyfingarinnar á Suðurlandi. 

Svæðisfulltrúunum um allt land var í fyrra falið að vinna áfram með hugmynd um nýtingu fjármagns og kom upp sú hugmynd að formenn og stjórnir íþróttahéraða myndum funda saman. Fyrirhugað var í fyrra að formenn á Suðurlandi heimsæktu fulltrúa Íþróttabandalags Vestmannaeyja (ÍBV) á síðasta ári. Fresta þurfti ferðinni vegna veðurs. Ferðin var loksins farin á föstudaginn í síðustu viku. 

Rakel segir markmið ferðarinnar hafa öðru fremur falist í því að hittast og ræða saman um störf stjórna íþróttahéraðanna, gefa og þiggja ráð og búa til dýrmæt tengsl. Dagskráin var afslöppuð og óformleg en  fyrirhuguð nýting á sameiginlegu fjármagni sem ætluð er inn í hreyfinguna var í brennidepli.

„Við fengum útsýnisferð og kynningu frá ÍBV og skoðuðum meðal annars Gullberg, sem er glæsileg lyftingaaðstaða í Týsheimilinu í Eyjum, Glófaxa, sem er nýja félagsaðstaða fyrir yngri iðkendur, en þar fá þau tækifæri á að nýta frítíma sinn í kringum æfingar og glæsilega búningsaðstöðu og nýjan gervigrasvöll á Hásteinsvelli. Þá fengum við einnig sýnisferð um Golfvöllinn og glæsilegt klúbbhúsið sem hefur flottan golfhermi, sem bæði ungir sem aldnir nýta allan ársins hring,“ heldur Rakel áfram. 

Ferðinni lauk með sameiginlegum kvöldverði á Einsa Kalda þannig að enginn fór svangur heim.
Rakel segir ferðina hafa heppnast vel í alla staði enda hafi samtalið opnað á frekari samskipti milli stjórnarmanna í framtíðinni. 

Næsti hittingur verður á sambandsþingi UMFÍ í október en það er fyrsta UMFÍ þing sem ÍBV sækir eftir að sambandið varð aðili að UMFÍ fyrr á árinu. 

Rakel bendir á að það sé svo gaman að geta unnið saman og pælt í mörgu í þá veru. Á meðal hugmyndanna sé að panta langferðabíl og að allur hópurinn af Suðurlandi verði samferða á sambandsþing UMFÍ í Stykkishólmi í október.