Vilja snúa aftur í sumarbúðir UMFÍ
„Sumarbúðirnar gengu rosalega vel. Við fórum í mikið af leikjum og fengum geggjað veður. Stelpurnar fengu besta 17. júní sem hugsast gat,“ segir Sigurður Guðmundsson, forstöðumaður sumarbúða UMFÍ, sem fóru fram í fyrsta sinn á dögunum á Reykjum í Hrútafirði.
Sumarbúðirnar, sem voru fyrir börn fædd 2011 til 2013, voru skiptar upp eftir kynjum, drengir voru eina vikuna og stúlkur hina.
Unnið var eftir því í sumarbúðum UMFÍ að þátttakendur fái þar tækifæri til þess að efla leiðtogahæfni sína, styrkleika og sjálfsmynd. Áhersla var á útiversu, hreyfingu, samvinnu og samveru í öllum verkefnum. Unnið var með nánasta umhverfi sumarbúðanna, í fjörunni og þeirri náttúru sem umlykur Reyki. Einnig er íþróttahús og sundlaug á svæðinu.
Sigurður segir líf og fjör hafa verið í sumarbúðunum, farið hafi verið í mikið af leikjum, þar á meðal í spennandi fjársjóðsleit og siglt út á kajak.
„Þeim fannst öllum skemmtilegt að vera úti og leika sér,“ Sigurður segir öll börnin sem hafi tekið þátt í sumarbúðunum hafa verið í skýjunum með dvölina og vilja endurtaka leikinn á næsta ári.
Fleiri myndir úr sumarbúðunum má sjá hér að neðan
