Landsmót UMFÍ 50+

Þátttökugjald er 6.000 krónur og fyrir það er hægt að taka þátt í öllum greinum mótsins. Þegar greiðslu á þátttökugjaldi er lokið er hægt að skrá sig í einstakar keppnisgreinar. Ekki þarf að skrá sig sérstaklega til þess að taka þátt í opnum greinum, bara mæta og skemmta sér með fjölskyldu og vinum! 

Greitt er sérstaklega fyrir miða á matar- og skemmtikvöld sem fram fer laugardagskvöldið 27. júní á Vitanum á Akureyri. Húsið opnar kl. 19:00 og borðhald hefst kl. 20:00. Að loknu borðhaldi verður dansað.

Matar- og skemmtikvöldið hefur verið afar vinsælt og færri komist að en vilja. Það er því um að gera að kaupa miða um leið og þátttaka á mótið er staðfest. Miðaverð á matar- og skemmtikvöld er 6.400 kr. 

Athygli er vakin á því að UMFÍ nýtir netföng sem skráð eru við skráningu til þess að koma á framfæri upplýsingum um viðburðinn. Með skráningunni gefa þátttakendur heimild fyrir því að nýta þær myndir og myndbönd sem kunna að vera teknar á viðburðinum og nýta þær í útgáfustarfsemi UMFÍ á hvaða formi sem það kann að vera. Með skráningu gefa þátttakendur jafnframt leyfi til þess að nöfn þeirra séu birt á heimasíðu UMFÍ vegna birtingu ráslista og úrslita. 

Athugið að UMFÍ tryggir ekki einstaklinga á viðburðum. 

Mótið verður haldið dagana 26. - 28. júní í Hrafnagilshverfi en einnig verður keppt á Akureyri og Dalvík. Mótið er í samstarfi við Ungmennasamband Eyjafjarðar (UMSE) og sveitarfélagið Eyjafjarðarsveit.

Eyjafjarðarsveit er ein blómlegasta sveit landsins og Hrafnagilshverfið er í næsta nágrenni við Akureyri. Eyjafjarðará liðast um dalinn og skapar gróskumikið landslag þar sem náttúra og búskapur fara saman. Þar eru fjölbreyttar göngu- og hjólaleiðir, hlaupaleiðir meðfram ánni og fjallgöngur fyrir þá sem vilja meira krefjandi útivist. Yfir dalnum gnæfir Kerling og setur svip á svæðið.

Í Hrafnagilishverfi er notalegur þéttbýliskjarni með fjölskylduvænni sundlaug, íþróttasvæði og glæsilegu tjaldsvæði. Þar ríkir hlýlegt andrúmsloft og góð aðstaða fyrir gesti mótsins. Á svæðinu má njóta veitinga úr héraði, heimsækja handverksfólk, fara í stuttar skoðunarferðir, golf, hestamennsku eða njóta kyrrðar og náttúrufegurðar.

Aðeins um 12 mínútna akstur er í Hrafnagilshverfið frá Akureyri, þar sem fjölbreytt menningarlíf og þjónusta bíður.

Upplýsingar um gistingu, afþreyingu og ferðatengda þjónustu má finna á vefsvæði Eyjafjarðarsveitar. 

Eyjafjarðarsveit býður þátttakendur Landsmóts UMFÍ 50+ velkomna í lifandi byggð þar sem hreyfing, samvera og náttúra mynda einstaka umgjörð fyrir mótið í sumar.

Mótið hefst á föstudagsmorgni og lýkur um miðjan dag á sunnudegi. Keppnisgreinar fara fram alla dagana og því er ómögulegt að taka þátt í þeim öllum. Markmiðið er að velja nokkrar greinar og prófa eitthvað nýtt.

Keppendur sækja mótsgögn í mótsstjórn við komu. Nánari upplýsingar um opnunartíma og staðsetningu koma fram í dagskrá.

Í mótsstjórn fá keppendur m.a. armband sem veitir viðkomandi heimild til keppni á mótinu og skal bera það allan tímann. Ef armband slitnar er alltaf hægt að fá nýtt.

Á mótinu verður keppt í 17 greinum fyrir 50 ára og eldri. Greinarnar sem í boði eru: Badminton, boccia, bogfimi, brennibolti (opin grein fyrir 20 ára og eldri), bridds, frisbigolf, frjálsar íþróttir, golf, götuhjólreiðar, píla, pokavarp, pútt, pönnukökubakstur, ringó, skák, skotfimi, stígvélakast og sund.

Mótsgestir sjá sjálfir um sína gistingu á mótinu.

Í Hrafnagilshverfinu er mögulegt að gista í Íslandsbænum fyrir þá sem vilja meiri lúxus en meira úrval er í boði á gistingu í nágrenni Hrafnagilshverfisins og síðan á Akureyri.

Tjaldsvæðið í Hrafnagilshverfi í Eyjafjarðarsveit er staðsett við íþróttasvæðið. Á tjaldsvæðinu er góð aðstaða, snyrtingar og vaskar eru úti á svæði og inni í þjónusturými í austurenda íþróttamiðstöðvarinnar eru snyrtingar, sturtur og þvottavél. Þar er einnig losunaraðstaða fyrir ferðaklósett. Rafmagnstenglar eru við hvert stæði á svæðum B-E og að hluta til á svæði A. Á hverju þessara svæða eru stæði fyrir 12-14 gistieiningar. Tjaldverðir sinna helstu þjónustuþáttum á tjaldsvæðinu en þeim til stuðnings er afgreiðsla íþróttamiðstöðvarinnar sem verður opin til kl. 22:00 fimmtudag og föstudag og frá 10:00 - 20:00 á laugardag og sunnudag. Opnunartíminn getur þó lengst í aðra hvora áttina eftir þeirri keppnisdagskrá sem verður í gangi í íþróttamiðstöðinni. 

Gjaldskrá tjaldsvæðisins 2026 er þessi:

• Gisting á mann hver nótt kostar kr. 1.750.-
• Rafmagn í einn sólarhring kostar kr. 1.100.-
• Frítt er fyrir börn 17 ára og yngri í fylgd með fullorðnum. 
• Gistináttagjald leggst ofan á allar seldar gistinætur hverrar gistieiningar (ekki á mann, heldur gistieiningu sem er t.d. tjald, fellihýsi, hjólhýsi, húsbíll).

Þar sem tjaldsvæðið verður frátekið fyrir mótsgesti þangað til tveimur vikum fyrir mót verður sendur út sérstakur bókunarhlekkur í upplýsingapósti frá UMFÍ í aðdraganda mótsins. Þessi bókunarhlekkur er aðeins ætlaður þeim sem ætla að taka þátt í mótinu. Starfsfólk íþróttamiðstöðvarinnar og tjaldverðir munu ekki geta tekið frá ákveðin stæði fyrir fram t.d. fyrir þá sem vilja vera hlið við hlið.

Auk keppni verður fjölbreytt dagskrá fyrir mótsgesti. Mótssetning fer fram í íþróttahöllinni á Akureyri kl. 17:00 föstudaginn 26. júní. Á Melgerðismelum verður hestamennska og þrautabraut, boðið verður upp á heilsufars-mælingar og á sunnudegi verður fjölskyldufjör í Hrafnagilshverfi.

Vinsæla matar- og skemmtikvöldið verður í veitingahúsinu Vitanum á Akureyri laugardagskvöldið 27. júní.

Eftir hádegi sunnudaginn 28. júní verður sannkölluð hátíð í Hrafnagilshverfi. Í boði verða fjölbreyttir íþróttaviðburðir þar sem gestir geta prófað ýmislegt. Allir eru velkomnir.

Hægt verður að prófa bogfimi, pokavarp, pútt, pétanque, frisbígolf og biathlon. Einnig verður kynning á göngufótbolta, boðið upp á fjölskylduhlaup og hestamenn teyma undir börnum.

Allt er ókeypis og opið öllum.

Veitingasala verður á flestum keppnissvæðum alla mótsdagana með léttum veitingum, kaffi og drykkjum.

Framkvæmdastjóri mótsins er Ómar Bragi Stefánsson. Netfang omar@umfi.is. Sími 898 1095.