Frábær lokadagur í Hveragerði

Landsmóti UMFÍ 50+ var slitið í Hveragerði um miðjan dag í dag að loknu hinu landsfræga stígvélakasti. Mótið hefur staðið yfir alla Jónsmessuhelgina í Hveragerði og tæplega 600 manns keppt í fjölda greina af ýmsu tagi. Ætla má að rúmlega 1.000 utanbæjarmenn hafi verði í bænum í tengslum við mótið, sem fór afskaplega vel fram.

Sunnudagurinn byrjaði með keppni í þríþraut og þrekkeppni, badminton og fuglagreiningu, að ótöldu stígvélakastinu.

Í stígvélakastrinu veitti Kjörís sérstök verðlaun fyrir skemmtilega tilþrif. Ein þeirra hlaut amma sem hlaut mikinn stuðning frá barnabörnum sínum í áhorfendahópnum.

Landsmót UMFÍ 50+ hefur verið haldið árlega síðan árið 2011. Það er fyrir fólk sem verður fimmtugt á árinu og eldri þátttakendur. Mótið er blanda af íþróttakeppni og annarri keppni, hreyfingu og því að fá fólk á besta aldri til að hafa gaman saman.

Hér má sjá myndir sem teknar voru á lokadegi mótsins í Hveragerði í dag.

Fleiri myndir frá mótinu verður hægt að skoða á myndasíðunni Flickr. Þar er líka hægt að skoða fleiri myndir sem tengjast starfi UMFÍ.

Smelltu hér og skoðaðu myndasafnið