Heimasíða svæðisstöðvanna komin í loftið

„Heimasíðan var gerð til að auðvelda þá miklu vinnu sem farið hefur fram í svæðisstöðvunum frá upphafi og gera efni um íþróttastarf aðgengilegra fyrir forsvarsfólk íþróttahéraða á Íslandi,” segir Jóhanna Íris Ingólfsdóttir, svæðisfulltrúi íþróttahéraðanna á Austurlandi.

Ný heimasíða svæðisstöðva íþróttahéraðanna fór í loftið á dögunum. Hún er samvinnuverkefni svæðisstöðvanna átta sem eru um allt land, ÍSÍ og UMFÍ. Efni hennar byggir á greiningarvinnu svæðisfulltrúanna, sem leiddi í ljós að skortur var á ákveðnu efni og upplýsingum og því fór hugmynd um heimasíðu fljótt af stað.

Vefslóðin er siu.is

Auk efnis sem  unnin eru á svæðisstöðvunum verður á síðunni hægt að nálgast ýmislegt fleira á einum stað á aðgengilegan hátt, sem til er hjá bæði ÍSÍ og UMFÍ. Efnið er fyrir þjálfara, foreldra og fyrir stjórnarfólk í héruðum og í félögum.

Efnisþáttum mun fjölga eftir því sem verkefninu vindur fram.

Svæðisfulltrúar og starfsfólk ÍSÍ og UMFÍ vinna í þremur hópum, sem hver um sig sér um verkfærakistu, stjórnsýslu og kynningarmál. Þessir hópar hafa allir komið að því að skilgreina hvað á að vera á síðunni og unnið efnið sem þar er birt. Tveir starfsmenn svæðisstöðvanna hafa séð um tæknilegu málin.

„Þetta er frábær samvinna þar sem þekking hvers starfsmanns nýtist sem best þegar unnið er svona þvert á sviðin og við vonumst til þess að heimasíðan muni nýtast hreyfingunni vel,” segir Jóhanna Íris, sem sæti á meðal annars í þeim hópi sem sér um kynningarmál svæðisstöðvanna.