Öll keppi á eigin forsendum
„Keppni á Unglingalandsmóti er fyrir alla og öll eiga að geta keppt á sínum forsendum. Á Unglingalandsmóti er pláss fyrir okkur öll,“ sagði Jódís Lilja Skúladóttir frá Vopnafirði og keppandi í upplestri á mótinu á Egilsstöðum um helgina. Hún flutti ávarp fyrir hönd keppenda við setningu Unglingalandsmóts UMFÍ á Vilhjálmsvelli í gærkvöldi.
Jódís minnti þátttakendur á mótinu á að hafa heiðarleika að leiðarljósi í keppnisgreinum og koma fram við andstæðinga á vellinum af virðingu.
„Við skulum efla vináttu og vinabönd og fara héðan að loknu móti, bara með góðar minningar,“ sagði hún að lokum.
Heilmikið fjölskyldufjör
Fjöldi mótsgesta og íbúa á Egilsstöðum mætti við setningu mótsins. Á meðal gesta var Willum Þór Þórsson, formaður ÍSÍ, en hann er fyrsti forseti ÍSÍ sem sækir mótið. Þar á meðal voru sveitarstjórnarfulltrúar í Múlaþingi, Fjarðabyggð og víðar.
Auk Jódísar fluttu ávarp þau Jóhann Steinar Ingimundarson, formaður UMFÍ, Dagmar Ýr Stefánsdóttir, sveitarstjóri Múlaþings, bauð fólk velkomið og Benedikt Jónsson, formaður Ungmenna- og íþróttasambands Íslands, gerði það sömuleiðis.
Kynnar á mótinu voru þau María Sigurðardóttir og Ernir Daði Arnbergz. Aðalfánaberi var glímukappinn Hákon Gunnarsson frá Reyðarfirði.
Eftir setningu mótsins var skellt í heljarinnar fjölskyldufjör fyrir þátttakendur og mótsgesti. Heilmikið líf og fjör var í Tjarnargarði, við Egilsstaðaskóla og í íþróttahúsinu.
Gríðarlegur fjöldi er á Egilsstöðum um helgina, keppendur eru um 1.100 talsins og mörg hundruð hjólhýsi, tjöld og vagnar á þeim tveimur tjaldsvæðum sem sett voru undir mótið. Allt hefur gengið vel og ekkert komið upp á og hefur mótsgestum verið hampað fyrir góða umgengni, bæði á keppnisvöllum og á tjaldsvæðum.
Hér má sjá nokkrar myndir frá mótssetningunni.
