Seinni umsóknarfrestur í Fræðslu- og verkefnasjóð
Búið er að opna fyrir umsóknir í Fræðslu- og verkefnasjóð UMFÍ. Sjóðurinn styrkir verkefni sem tengjast félags- og íþróttastarfi ungmennafélagshreyfingarinnar, svo sem með því að auka menntun og þekkingu félaga innan hreyfingarinnar á íþróttagreinum, þjálfun í félagsmálum og félagsstarfi.
Rétt til umsóknar úr sjóðnum eiga sambandsaðilar UMFÍ, aðildarfélög sem eru virk í starfi og deildir innan þeirra. Einnig eiga stjórn og nefndir UMFÍ rétt á að sækja um styrk úr sjóðunum.
Tveir umsóknarfrestir eru í sjóðinn á hverju ári. Sá fyrri er frá 1. apríl til 1. maí og sá seinni frá 1. október til 1. nóvember.
Í maí veitti Fræðslu- og verkefnasjóður UMFÍ 12,6 milljónum króna til 73 verkefna hjá öllum sambandsaðilum UMFÍ um allt land. Verkefnin voru af ýmsum toga.
Þar á meðal voru:
- Sameiginlegt fræðsluerindi íþróttahéraða á Vesturlandi.
- Fræðsluferð fimleikadeildar Selfoss til Danmerkur.
- Pílufélag Kópavogs fékk ýmsa styrki.
- Ungmennafélag Biskupstungna hlau styrk fyrir málstofu um íþróttamál í Uppsveitum.
- Dómaranámskeið, þjálfaranámskeið, tungumálaskóli og ýmislegt fleira.
Í samræmi við reglugerð sjóðsins leggur sjóðsstjórn áherslu á að veita styrki til:
- Fræðslu- og forvarnaverkefna sem eru til þess fallin að auka þekkingu og fagmennsku innan héraðs, félags og/eða deildar.
- Þjálfara- og/eða dómaranámskeiða.
- Verkefna sem stuðla að aukinni þekkingu og varðveislu á menningu og sögu héraðs, félags og/eða héraðs.
- Verkefna og/eða viðburða sem hafa það að markmiði að efla þjálfun forystufólks, leiðbeinenda og sjálfboðaliða í íþróttastarfsemi.
- Verkefni sem stuðla að stærðarhagkvæmni og samnýtingu í upplýsingatæknimálum.
Athygli er vakin á því að sjóðurinn styrkir EKKI tækja-, áhalda- og búnaðarkaup, fundakostnað (þ.m.t. veitingar) og almennan rekstur félaga.
Styrkur er að öllu jöfnu aldrei hærri en 400.000 kr. Sjóðsstjórn getur þó veitt hærri styrki í undantekningartilfellum.