Svæðisfulltrúa leitað fyrir höfuðborgarsvæðið

ÍSÍ og UMFÍ leita að öflugum og metnaðarfullum einstaklingi með brennandi áhuga á íþróttastarfi á Íslandi til að ganga til liðs við teymi svæðisfulltrúa sem starfa víða um landið. Um er að ræða spennandi tækifæri fyrir áhugasaman einstakling til að taka virkan þátt í að byggja upp öflugt íþróttastarf á höfuðborgarsvæðinu og verða hluti af frábæru teymi á landsvísu.

Sextán svæðisfulltrúar eru staðsettir á átta svæðastöðvum víðs vegar um landið og eru þeir tveir á hverri stöð. Þeir starfa sem ein liðsheild þar sem styrkleikar og hæfileikar hvers og eins fá að njóta sín í nánu samstarfi við hvert annað og við íþróttahreyfinguna í heild. 

Tveir svæðisfulltrúar verða á höfuðborgarsvæðinu og er verið að leita að öðrum þeirra. Hinn svæðisfulltrúinn sem fyrir er, er Hansína Þóra Gunnarsdóttir.

Umsóknarfrestur er til 2. maí og er hægt að sækja um hér. 
 

• Samstarf, samskipti og stuðningur við íþróttahéruð og aðildarfélög.
• Samstarf og samskipti við opinbera aðila varðandi stuðning og þjónustu íþróttafélaga um allt land.
• Vinnsla verkefna sem tengjast aukinni þátttöku barna í íþróttum og farsæld.
• Verkefnisstjórnun og vinna að nýsköpunarverkefnum.
• Mótaskipulag og eftirfylgni tengt fræðslumálum íþróttahéraða.
• Fræðsla og kynning til íþróttahéraða og aðildarfélaga í ýmsum málum.
• Samræming málaflokka, stjórnarhátta, verkferla, öryggis- og viðbragðsáætlana.
• Koma upp og viðhalda leiðbeiningum og viðmiðum fyrir stjórnun íþróttahéraða og stjórnendur íþróttafélaga.
• Yfirlit og eftirfylgni með lögbundnum skyldum íþróttahéraða og aðildarfélaga.
• Umsjón og þátttaka í samráði og á samræmingarfundum.

Leitað er að hæfileikaríkum einstaklingum með fjölbreytta þekkingu til að gegna ofangreindum verkefnum.

• Reynsla og þekking af starfi innan íþróttahreyfingarinnar er kostur.
• Háskólamenntun sem nýtist í starfi er kostur.
• Styrkleiki og reynsla á eftirfarandi sviðum er kostur:
• Verkefnastjórnun, mótun ferla, fræðsla og miðlun upplýsinga.
   

Til viðbótar er mikilvægt að umsækjendur búi yfir frumkvæði, séu sjálfstæðir, geti unnið í teymi, miðlað upplýsingum munnlega og skriflega, unnið skipulega, haft góða samskiptahæfileika og getu til að ná árangri í mjög fjölbreyttu umhverfi. Umsækjendur þurfa að sjálfsögðu að hafa hreint sakavottorð í samræmi við ákvæði í íþróttalögum.

Um verkefnið
ÍSÍ og UMFÍ standa að verkefninu og hafa auk þess fengið stuðning frá mennta- og barnamálaráðuneytinu. Samtökin hafa undirritað samning um eflingu íþróttastarfs á landsvísu með því að koma á fót svæðastöðvum og hvatasjóði. Svæðastöðvunum er ætlað að styðja við íþróttahéruð landsins við innleiðingu á stefnu íþróttahreyfingarinnar og ríkisins í íþróttamálum auk þess að auka þátttöku barna og ungmenna í íþróttastarfi með sérstaka áherslu á þátttöku fatlaðra barna, barna af tekjulægri heimilum og barna með fjölbreyttan tungumála- og menningarbakgrunn.Búið er að skipta öllu landinu upp í átta svæði þar sem á hverju svæði verður unnið í samvinnu við íþróttahéruð, aðildarfélög íþróttahreyfingarinnar og opinberum aðilum að markmiðum samningsins og stefnu ríkisins og íþróttahreyfingarinnar í íþróttamálum. 

Frekari upplýsingar um verkefnið má finna á vefsíðu isi.is og umfi.is.

Ítarlegri upplýsingar og umsókn