Vorfundur UMFÍ á Selfossi
Góðir gestir sátu vorfund UMFÍ sem fram fór á Selfossi laugardaginn 9. maí. Þar voru fulltrúar sambandsaðila, í sumum tilvikum bæði formenn og framkvæmdastjórar íþróttahéraða, næstum allir svæðisfulltrúar íþróttahéraðanna og stjórn og starfsfólk UMFÍ.
Jóhann Steinar Ingimundarson, formaður UMFÍ, setti fundinn, bauð gesti velkomna og fór í stórum dráttum yfir efni vorfundarins og fyrirkomulag hans.
Auður Inga Þorsteinsdóttir, framkvæmdastjóri UMFÍ, tók við af honum. Hún fjallaði um ýmis mál sem kom úr sambandsþingi UMFÍ í október í fyrra, björgunarpakkann svokallaða og nokkur verkefni sem eru á ýmsum sviðum, þar á meðal ýmis konar samstarf sem horft er til að geti hámarkað samfélagslegan ávinning af skipulögðu íþróttastarfi.
Á meðal helstu nýjunganna sem Auður sagði frá er ný vefgátt, sem er í smíðum hjá Abler, og á að auðvelda fólki að finna íþróttastarf við hæfi, sérstaklega fyrir börn með fatlanir. Vonast er til þess að öll íþróttahreyfingin geti nýtt sér gáttina.
Hún benti jafnframt á að bráðabirgðalausn hefði verið þróuð fyrir íþróttafélög svo þau gætu séð hvaða þjálfarar á þeirra vegum hefðu skilað inn sakavottorði.
Af því efni sem þegar er tilbúið eða langt komið í vinnslu er fræðsluefnið íþróttir og konur, sem eru tæplega 50 fyrirlestrar á netinu sem eru sérstaklega ætlaðir konum, auk upptaka sem er búið að taka upp og ætlað er að leiðbeina um framkvæmd funda.
Auður fór jafnframt yfir stöðu stefnumótunar íþróttahreyfingarinnar sem staðið hefur yfir frá því í fyrrahaust. Annar fasi verkefnisins fólst í fundum um allt land með fulltrúum íþróttahreyfingarinnar.
Þróun íþrótta til framtíðar
Auður sagði samfélagslegan ávinning af íþróttastarfi ótvíræðan og rifjaði upp að 50% barna sem stundi íþróttir telji sig hamingjusöm á móti þeim 33% sem geri það ekki. Svo virðist sem frambjóðendur allra stjórnmálaflokka séu sammála um mikilvægi íþróttaiðkunar og lofi þeir að hækka frístundastyrki. Af þeim sökum þurfi að efla hreyfingu barna.
Nauðsynlegt er hins vegar að þróa og laga íþróttastarf að breyttum tímum, að sögn Auðar, sem benti á að íþróttahreyfingin nái til barna í skipulögðu íþróttastarfi. Eldra fólk sé hins vegar óræðari hópur iðkenda hér. Hún benti á að í Danmörku sé sem dæmi stærsti hópur iðkenda á aldrinum 40–59 ára. Þessi sami hópur sést ekki í gögnum íþróttahreyfingarinnar hér á landi. Það veki upp spurningar um hvort og hvernig íþróttahreyfingin geti náð til þessa aldurshóps.
Að lokum benti Auður á þann efnahagslega ávinning sem felst í því ef börn af tekjulægri heimilum taka þátt í skipulögðu íþróttastarfi. Miðað við norska rannsókn og þarlent reiknilíkan nemi árlegur ávinningurinn af því að 100 einstaklingar, 20 ára og eldri, fari úr því að vera líkamlega óvirkir í það að hreyfa sig reglulega, 1,5 milljörðum norskra króna.
Blásum lofti í boltann
Auður benti á að á sama tíma og ávinningur af skipulögðu íþróttastarfi er ótvíræður hafa fjárframlög til íþróttahreyfingarinnar ekki fylgt verðbólguþróun og því í raun dregist saman í gegnum árin.
„Loftið hefur verið tekið úr boltanum okkar og þetta er hvatning til að blása lofti í hann á ný,“ sagði hún.
Eftir inngangsorð Auðar tóku við umræðuhópar þar sem fjallað var um ýmsar hliðar íþrótta og íþróttastarfs, mótahald og fleira.
Þrjú erindi til viðbótar voru flutt á vorfundinum. Birna Hannesdóttir, svæðisfulltrúi íþróttahéraðanna á Vestfjörðum, fjallaði um stefnumótun íþróttafélaga á svæðinu, Sigurður Eyjólfur Sigurjónsson, framkvæmdastjóri Ungmennasambands Vestur-Skaftafellssýslu (USVS), ræddi um nýlegan samning sambandsins við sveitarfélögin Mýrdalshrepp og Skaftárhrepp. Að lokum fjallaði Ómar Bragi Stefánsson, framkvæmdastjóri móta UMFÍ, um mótahald og áskoranir tengdar Unglingalandsmóti UMFÍ.
Hér má sjá nokkrar myndir frá fundinum.
