Landsmót UMFÍ 50+

Á 46. Sambandsþingi UMFÍ sem haldið var í Reykjanesbæ 2009 var samþykkt að fela stjórn UMFÍ að skipa nefnd sem hefði það hlutverk að útfæra starf eldri ungmennafélaga til framtíðar. Hugmyndunum átti að skila inn fyrir sambandsráðsfund árið 2010.  

Nefndin var skipuð fljótlega eftir sambandsþingið og hófst hún strax handa við að marka starf eldri ungmennafélaga UMFÍ. Nefndin er skipuð fólki sem hafði reynslu á hreyfingu eldra fólks. Nefndina skipuðu: Anna R. Möller, Flemming Jessen, Þórey S. Guðmundsdóttir, Hjörtur Þórarinsson og Sigurður Guðmundsson sem var starfsmaður nefndarinnar. 

Á sambandsráðsfundi 2010 á Egilsstöðum voru hugmyndir nefndarinnar kynntar. Vel var tekið í þessar hugmyndir og nefndin hvött til að halda áfram að útfæra hugmyndirnar.  

Stjórn UMFÍ samþykkti svo á stjórnarfundi hjá sér í febrúar 2011 að efna til Landsmóts UMFÍ 50+.

Markmið mótsins er að skapa vettvang fyrir fyrir aldurshópinn 50 ára og eldri til þess að koma saman og njóta þess að vera í góðum félagsskap og keppa í fjölda íþróttagreina. 

Fyrsta Landsmót UMFÍ 50+ fór fram dagana 24. - 26. júní 2011 á Hvammstanga.