Hver króna í golf skilar tveimur til baka

KPMG metur samfélagslegt virði golfíþróttarinnar út frá þremur stoðum:

• Vellíðan og lífsgæði: 15,7 milljarðar króna. Metið út frá því sem kylfingar eru tilbúnir að verja til íþróttarinnar, en meðalkylfingur ver um 536 þúsund krónum á ári til golfiðkunar.
• Hagræn áhrif: 11,7 milljarðar króna. Beint hagspor golfhreyfingarinnar árið 2024, meðal annars rekstur klúbba og valla, kennsla og verslun.
• Samfélagslegur ávinningur: 3,8 milljarðar króna. Bætt lýðheilsa og minni framtíðarkostnaður í heilbrigðis- og velferðarþjónustu.

Samtals eru þetta 31,2 milljarðar króna á móti 15,7 milljörðum í útgjöldum kylfinga, sem gefur svokallaðan SROI-stuðul upp á 2,0. Niðurstaðan er sambærileg við finnska rannsókn þar sem stuðullinn var 1,9. Skýrsluhöfundar taka fram að matið á samfélagslega ávinningnum sé varfærið, því sömu forsendur voru notaðar og í Finnlandi þótt golf sé mun útbreiddara hér. Um 8% Íslendinga eru í golfklúbbi en um 3% Finna.

Skýrslan lýsir klúbbunum sem mikilvægum samfélagslegum innviðum. Þeir skapa aðgengi að hreyfingu og útivist í nærumhverfi fólks, og klúbbhúsin eru víða samkomustaðir þar sem haldin eru mót, viðburðir og fundir.

Starfið byggir að stórum hluta á sjálfboðaliðum. Með því skapa klúbbarnir verðmæti sem ná langt út fyrir íþróttina sjálfa og styrkja félagsauð, tengsl og lífsgæði í þeim samfélögum sem þeir þjóna. Þetta er kjarninn í starfi ungmennafélagshreyfingarinnar: öflugt félagsstarf í heimabyggð sem stendur öllum opið.

Skýrslan Virði golfíþróttarinnar fyrir líðan, heilsu og samfélag Íslendinga byggir á gögnum GSÍ um skráða rástíma, spurningakönnun sem 1.897 kylfingar svöruðu í júní 2026 og aðferðafræði sem notuð hefur verið til að meta samfélagslegt virði golfs.

Embætti landlæknis ráðleggur fullorðnum að stunda rösklega hreyfingu í 150–300 mínútur á viku. Fram kemur í skýrslunni að kylfingar 19 ára og eldri hreyfðu sig að meðaltali í 310 mínútur á viku við golfleik yfir sumarmánuðina maí til ágúst 2025. Það jafngildir rúmlega einum golfhring á viku. Golfið eitt nægir því til að ná ráðlögðu viðmiði, og vel það.

Kylfingar láta ekki þar við sitja: 85% þeirra stunda aðra hreyfingu samhliða golfinu og rúmur helmingur gerir það allt árið. Golfhermar hafa líka lengt tímabilið, því 82% svarenda nota golfhermi utan hefðbundins golftímabils. Golf er því hluti af virkum lífsstíl, ekki tilfallandi tómstund.

Ein af athyglisverðari niðurstöðum skýrslunnar er sú að virkni í golfi eykst með hækkandi aldri. Í flestum íþróttum fækkar iðkendum þegar líður á ævina. Í golfi hins vegar er þróunin á hinn veginn. Fólk á aldrinum 61–70 ára spilaði flesta hringi að meðaltali árið 2025, eða 31,7, og þeir sem eru 71 árs og eldri komu næstir með 30,6 hringi. Í eldri aldurshópunum fer vikuleg hreyfing yfir sumarið yfir 330–350 mínútur.

Um 12% landsmanna 50 ára og eldri eru skráð í golfklúbb og rúmlega 4.100 félagsmenn eru 71 árs eða eldri. Í samfélagi þar sem þjóðin eldist hratt er þetta dýrmætt. Golfklúbbarnir halda fólki á hreyfingu, úti í náttúrunni og í félagsskap annarra á þeim árum sem hreyfing og félagsleg tengsl skipta hvað mestu fyrir heilsu og lífsgæði.

Lýðheilsa snýst ekki aðeins um líkamann. Í könnun GSÍ segja 92,7% kylfinga að golf hafi jákvæð áhrif á andlega líðan sína, og þar af eru 68,2% mjög sammála. Átta af hverjum tíu segja golf veita sér gleði og ánægju og 71,4% nefna útiveruna sérstaklega.

Félagslegi þátturinn vegur einnig þungt. Tæp 60% segja golf góða leið til að verja tíma með vinum og fjölskyldu, rúmur helmingur segir íþróttina sameina leik og félagslíf og 37% segjast kynnast nýju fólki í gegnum golfið.

Skýrsluhöfundar benda á að golf sameini þrjá þætti sem Alþjóðaheilbrigðismálastofnunin leggur áherslu á í lýðheilsu: reglulega hreyfingu, félagslega þátttöku og útiveru í náttúrulegu umhverfi. Samspil þessara þátta margfaldar ávinninginn umfram það sem hreyfingin ein skilar.

Á Íslandi eru 63 golfklúbbar, frá höfuðborgarsvæðinu, þar sem 17 klúbbar þjóna um 17 þúsund félögum, til Vestfjarða og Austurlands, þar sem sex klúbbar eru í hvorum landshluta. Skýrslan lýsir klúbbunum sem mikilvægum samfélagslegum innviðum. Þeir skapa aðgengi að hreyfingu og útivist í nærumhverfi fólks, og klúbbhúsin eru víða samkomustaðir þar sem haldin eru mót, viðburðir og fundir.

Starfið byggir að stórum hluta á sjálfboðaliðum. Með því skapa klúbbarnir verðmæti sem ná langt út fyrir íþróttina sjálfa og styrkja félagsauð, tengsl og lífsgæði í þeim samfélögum sem þeir þjóna. Þetta er kjarninn í starfi ungmennafélagshreyfingarinnar: öflugt félagsstarf í heimabyggð sem stendur öllum opið.

• Konur eru þriðjungur kylfinga. Af 29.370 félagsmönnum í golfklúbbum árið 2025 voru 66% karlar og 34% konur. Fyrst ávinningurinn af golfi fyrir líkamlega og andlega heilsu er jafn mikill og skýrslan sýnir, er augljóst tækifæri í að ná til fleiri kvenna.

• Börn og unglingar eru fámennur hópur. Samkvæmt tölum í skýrslunni eru 422 börn yngri en tíu ára og 3.649 börn og unglingar á aldrinum 10–18 ára skráð í golfklúbba, samtals um 4.100 eða um 14% félagsmanna. Íþrótt sem fólk getur stundað alla ævi er kjörin til að byggja upp hreyfivenjur snemma, og því meira sem klúbbarnir ná til ungs fólks, því lengur skilar fjárfestingin sér.

• Þátttakan er misjöfn eftir landshlutum. Hlutfall íbúa sem spila golf er 13,8% á Suðurlandi og 11,7% á Vesturlandi, en 5,2% á Norðausturlandi og 4,2% á Austurlandi. Í minni byggðarlögum hvílir starfið á fáum herðum, og þar getur stuðningur héraðssambanda og sveitarfélaga skipt sköpum.

• Kostnaður getur verið hindrun. Meðalkylfingur ver um 536 þúsund krónum á ári til golfiðkunar samkvæmt skýrslunni. Upphæðin segir sitthvað um það virði sem kylfingar telja sig fá, en hún minnir líka á mikilvægi þess að halda aðgengi opnu, til dæmis með kynningarverði, nýliðastarfi og barna- og unglingastarfi.

Hægt að lesa enn meira í skýrslu KMPG:

Skýrsla KPMG